Сёлета спаўняецца 30 гадоў з правядзення першага Усебеларускага народнага сходу: 19 – 20 кастрычніка 1996 г. Першы ў гісторыі суверэннай Беларусі народны форум адбыўся ў няпросты для краіны час эканамічнага хаосу і палітычнага канфлікту.
4 740 дэлегатаў – прадстаўнікі ўсіх рэгіёнаў, палітычных сіл, сфер дзейнасці і ўзростаў, выбраныя на пасяджэннях працоўных калектываў і грамадскіх аб’яднанняў, – сабраліся ў Мінску для абмеркавання шляхоў выхаду з грамадска-палітычнага крызісу, вызначэння стратэгіі эканамічнага развіцця краіны.
Прэзідэнт Рэспублікі Беларусь Аляксандр Лукашэнка, выкарыстоўваючы сваё канстытуцыйнае права, склікаў сход, каб забяспечыць найбольш поўны ўдзел шырокіх слаёў насельніцтва ў абмеркаванні прымаемых кіраўніцтвам краіны рашэнняў, якія вызначаюць будучыню маладой беларускай дзяржавы.
У народным форуме прынялі ўдзел і случчане. «Хлебаробы саўгаса «Слуцкі» назвалі сваім прадстаўніком дырэктара саўгаса В.М. Ачапоўскага. Свайго старшыню калгаса Л.М. Савановіч выбралі дэлегатам працаўнікі калгаса імя Арджанікідзэ. Ад калектыву гандлёва-прамысловага аб’яднання «Металіст» выбраны дэлегатам рэзчык па метале А.Л. Сакалоўскі. К.В. Уласаўца назвалі сваім дэлегатам на Усебеларусскі народны сход калгаснікі калгаса імя Энгельса. Ляснічага Вераб’ёўскага лясніцтва У.І. Цвірко выбралі работнікі лесу. Прараб С.М. Сарагавец – дэлегат ад калектыву ААТ «ПМК-71». У раёне вылучаны таксама прадстаўнікамі на Усебеларускі народны сход старшыня райвыканкама З.К. Ломаць і першы намеснік старшыні П.Б. Даўгучыц» (газета «Слуцкі край», 2 кастрычніка 1996 г.).
Таксама ў газеце паведамлялася, што на народны сход выбраны 25 дэлегатаў з горада. У іх ліку старшыня гарвыканкама А.А. Сайко, першы намеснік старшыні В.Р. Сітнік, дырэктар СШ №1, старшыня гарадскога Савета дэпутатаў Я.Р. Жартун, дырэктар цукроварафінаднага камбіната А.П. Купрыяненка, дырэктар вышэйшага ПТВ перапрацоўчай прамысловасці Б.Б. Блахін і іншыя.
Кіраўнік дзяржавы выступіў на форуме з дакладам, у якім прадставіў грунтоўны аналіз сітуацыі, якая складвалася ў краіне за першыя гады яе незалежнасці і свайго знаходжання на пасадзе Прэзідэнта, абазначыў далейшую стратэгію развіцця дзяржавы і грамадства з акцэнтам на сацыяльна арыентаваную рыначную эканоміку.
Дэлегаты абмеркавалі асноўныя напрамкі сацыяльна-эканамічнага развіцця Рэспублікі Беларусь на 1996 – 2000 гады (прыярытэтамі былі аб’яўлены экспарт тавараў і паслуг, жыллёвае будаўніцтва, развіццё аграпрамысловага комплексу), праект новай рэдакцыі Канстытуцыі і пытанні, вынесеныя Кіраўніком дзяржавы на рэспубліканскі рэферэндум.
Першы агульнанацыянальны форум вызначыў вектар развіцця дзяржавы на дзесяцігоддзі наперад: сацыяльна арыентаваная рыначная эканоміка, канстытуцыйная рэформа, якая прадугледжвае моцнага Прэзідэнта, – гаранта суверэнітэту і незалежнасці краіны.
Пётр Даўгучыц, удзельнік першага Усебеларускага народнага сходу:
– У форуме ў 1996 годзе ўдзельнічалі амаль 5 000 дэлегатаў. Сход прыняў першую ў гісторыі суверэннай Беларусі Праграму сацыяльна-эканамічнага развіцця рэспублікі на пяцігодку. У дакуменце былі вызначаны прыярытэты – развіццё экспарту, жыллёвага будаўніцтва і развіццё аграпрамысловага комплексу. Дэлегаты падтрымалі курс развіцця дзяржавы, прапанаваны Прэзідэнтам: стабілізацыя сацыяльна-эканамічнай сітуацыі ў краіне і правядзенне канстытуцыйнай рэформы, якая выступае гарантам стабільнасці. Час быў няпросты, трэба было паднімаць краіну на новы ўзровень развіцця. На жаль, на той момант беларусы былі на мяжы расколу грамадства. Але сітуацыю ўдалося пераламіць, і мы, дэлегаты першага Усебеларускага народнага сходу, прынялі большасцю галасоў рэзалюцыю да беларускага народа, у якой была выказана падтрымка курса Прэзідэнта нашай краіны.
«СК».
