Вольга Аляксандраўна працуе тут з моманту адкрыцця аб’екта, які быў запушчаны ў 2015 годзе.
– У нас цудоўны калектыў спецыялістаў, які сфарміраваўся ў першыя гады існавання комплексу, – гаворыць яна. – Кожны як належыць выконвае свае абавязкі. У мае ж абавязкі ўваходзіць кантроль за доглядам парасят, якія паступаюць да нас у цэх ва ўзросце ад месяца і гадуюцца да чатырох, іх сартаванне.
У памяшканнях свінагадоўчага комплексу аг.Грэск ААТ «Слуцкі мясакамбінат» створаны добрыя ўмовы для ўтрымання жывёлы, пастаянна падтрымліваецца санітарны рэжым, сістэма тэрмарэгуляцыі забяспечвае неабходны тэмпературны рэжым. Але без чалавечага фактара не абысціся – гэта кармленне і догляд жывёлы.
Важна любіць сваю справу, тады і вынік будзе станоўчы, лічыць жанчына. Расказвае, што ў школьныя гады марыла стаць ваеннай, але так склалася, што скончыла Віцебскую акадэмію ветэрынарнай медыцыны і засталася працаваць у сферы сельскай гаспадаркі. Праца нялегкая, аднак арганізаваны падвоз да месца працы, рабочыя забяспечаны гарачым харчаваннем, спецадзеннем, створаны добрыя ўмовы. Задавальняе і заработная плата.
Вольга Аляксандраўна кажа, што сваё месца працы не прамяла б на іншае. Тым больш, што вырасла у вёсцы, бацькі трымалі гаспадарку, дапамагала ім.
– Ганаруся, што сумеснымі намаганнямі наш калектыў дасягнуў значных поспехаў. Добрыя прывагі жывёлы атрыманы на адкорме: сярэднясутачны паказчык за мінулы год склаў 942 грамы. Павялічылася і пагалоўе жывёлы, – расказвае Вольга Аляксандраўна. – Усе гэта дзякуючы сумеснай зладжанай рабоце людзей, якія працуюць у нас даўно і ўносяць годны ўклад у агульную справу. Кіруюць нашым калектывам дасведчаныя спецыялісты Уладзіслаў Арцем’еў і Валерый Мысліцкі.
Вольга Аляксандраўна – натура шматгранная, якая не зводзіць вобраз жыцця да формулы «праца – дом – праца». Дома яе чакае 11-гадовы сынок, якому таксама патрэбна ўвага, але жанчына знаходзіць сілы і для грамадска карысных спраў. Яна валанцёр пошукава-выратавальнага атраду «Анёл», які зай-маецца пошукам прапаўшых грамадзян.
– У нашай камандзе людзі самых розных прафесій, якія заўсёды гатовы прыйсці на дапамогу, вельмі цікавыя і дабрадушныя. Іншы раз усяго за некалькі часоў нам удаецца знайсці прапаўшага чалавека. Расклейваем лістоўкі, кантактуем з людзьмі, а бывае і адзін рэпост у інтэрнэце дапамагае знайсці чалавека за гадзіну – другую.
З асаблівым настроем Вольга Аляксандраўна расказвае і пра спорт. Дарэчы, яна з задавальненнем удзельнічае ў раённых спаборніцтвах па лыжным спорце, у 2021 годзе заняла чацвёртае месца. Захапляецца іншымі відамі спорту.
