Случчанін Андрэй Сяргееў у складзе дэлегацыі Беларусі прыняў удзел у XIV міжнародным маладзёжным форуме «Сяброўства без межаў»
Андрэй Сяргееў (на фота другі злева) працуе на Слуцкім цукроварафінадным камбінаце начальнікам тэхнічнага бюро. Ён – лідар пярвічкі БРСМ прадпрыемства, актыўны, вельмі пазітыўны малады чалавек. Моладзі ў нашай краіне прадастаўляюцца шматлікія магчымасці для развіцця, прафесійнага ўдасканалення і росту, а вынік залежыць ад асабістага імкнення да гэтага, лічыць Андрэй.
Ён скончыў Беларускі нацыянальны тэхнічны ўніверсітэт, на цукроварафінадным камбінаце прыйшлося пачынаць слесарам. Праз некалькі месяцаў Андрэй працаваў ужо інжынерам, а яшчэ праз некаторы час узначаліў тэхнічнае бюро.
– На нашым прадпрыемстве створаны спрыяльныя ўмовы для моладзі, было б жаданне сябе праявіць. Кіраўніцтва нас падтрымлівае, дапамагае, для нашых ініцыятыў – зялёнае святло. І вельмі важна, што маладым давяраюць, ускладваюць на нас надзеі. Гавораць, вам будаваць. Мы і будуем, – усміхаецца Андрэй Сяргееў. – Узрост многіх кіраўнікоў структурных падраздзяленняў камбіната – да 40 гадоў. Наша прадпрыемства прагрэсіўнае, на гэта і моладзь нацэльваюць – быць у ліку лепшых. Так што стараемся трымаць марку.
Пярвічная арганізацыя БРСМ цукроварафінаднага камбіната адна з самых вялікіх. Але, як адзначыў Андрэй Сяргееў, у яго няма мэты «запісаць» як мага больш маладых людзей у арганізацыю. Той, хто прыходзіць па ўласнай ініцыятыве, і ў жыцці пярвічкі актыўна ўдзельнічае. Спартыўныя спаборніцтвы ўнутры камбіната і паміж прадпрыемствамі галіны, творчыя конкурсы, розныя раённыя мерапрыемствы – моладзь цукроварафінаднага камбіната заўсёды адклікаецца на прапановы. Нядаўна прывезлі перамогу з міжгаліновага творчага конкурсу. Рыхтаваліся, расказаў сакратар пярвічкі БРСМ, дзесьці паўгода, збіраліся пасля работы і рэпеціравалі. Такія нефармальныя зносіны, лічыць Андрэй, толькі на карысць узаемаадносінам у калектыве, агульнай справе і рабоце. І калі раней прыходзілася запрашаць маладых людзей да ўдзелу ў мерапрыемствах, то цяпер даводзіцца амаль конкурс праводзіць.
Як адзін з лепшых маладзёжных лідараў Случчыны Андрэй Сяргееў удзельнічаў у міжнародным фестывалі «Сяброўства без межаў», які праходзіў з 21 па 25 чэрвеня ў Нацыянальным дзіцячым аздараўленчым лагеры «Зубраня» і сабраў моладзь з Літвы, Латвіі, Украіны, Казахстана, Расіі, Кыргызстана, Узбекістана, Сірыі, Вьетнама, Кітая, Камеруна, Азербайджана і іншых краін. У ліку іншых прадстаўнікоў прадпрыемстваў нашай краіны старшыня пярвічкі БРСМ Слуцкага цукроварафінаднага камбіната прэзентаваў вопыт работы з моладдзю ў Беларусі на прыкладзе свайго камбіната, удзельнічаў у рознапланавых сустрэчах, круглых сталах, інтэрактыўных гульнях.
– Праграма была вельмі насычанай, шмат інфармацыі, шмат зносін, было вельмі цікава, – падзяліўся ўражаннямі Андрэй Сяргееў. – Наша група наведала БелАЭС у Астраўцы, кафедру маладзёжнай палітыкі і сацыякультурных камунікацый Рэспубліканскага інстытута вышэйшай школы, пабывалі ў Дзяржаўным музеі Вялікай Айчыннай вайны. Для нас былі арганізаваны пляцоўкі па абмене вопытам. У кожнай краіне ёсць нешта сваё адметнае, цікавае. Маладзёжныя арганізацыі і аб’яднанні – сучасны трэнд. У Казахстане, напрыклад, развіваецца дыстанцыйнае навучанне, як і ў нас, падтрымліваюць маладых спецыялістаў. Але ведаеце, на маю думку, у нас маладзёжнае пытанне найбольш распрацаванае, можа, таму і праводзіўся фестываль менавіта ў Беларусі. Ва ўсякім выпадку, такі вывад я зрабіў пасля ўсіх прэзентацый, абмеркаванняў. На сустрэчы з Міністрам адукацыі Рэспублікі Беларусь І.В. Карпенка ўзнялі пытанне размеркавання. Некаторыя з замежных гасцей такі падыход ацанілі, добра, калі стартавую пляцоўку дае дзяржава. Вельмі спадабалася атмасфера фестывалю. Такія міжнародныя сустрэчы вельмі карысныя. Яшчэ раз усведамляеш, колькі дзвярэй адкрыта перад моладдзю.
Ірына ШЧАРБОВІЧ.
