З-за ўласных памылак
14.11.2018
Матч «Слуцка» з «Дынама-Мінск» хоць і не прынёс зноў ні аднаго ачка нашай камандзе ў 28 туры Беларусбанк – чэмпіянату па футболе, але ж пакінуў ужо лепшыя, чым раней, уражанні.
Каманда старалася змагацца. Валоданне мячом было амаль роўнае (51% у «Слуцка»), 10 удараў па варотах, з іх 1 у створ (20 і 7 адпаведна ў «Дынама»), дакладнасць перадач – 82% (84% у дынамаўцаў), менш слуцкія футбалісты выйгравалі ў адзінаборствах – 46% супраць 54%.
«Слуцк» прапусціў гол ужо на 8-й хвіліне, а на 88-й «Дынама-Мінск» замацавала перамогу яшчэ адным. Вынік – 2:0, і «Слуцк» па-ранейшаму на восьмым месцы ў турнірнай табліцы.
Галоўны трэнер СФК «Слуцк» Віталій Паўлаў:
– Шчыра кажучы, зыходзячы з сітуацыі, якая склалася, рыхтаваліся да горшага. І зноў прайграём з-за ўласных памылак, не магу растлумачыць іх, а адыгрывацца апошнім часам у нас зусім не атрымліваецца. Тым не менш, маглі забіць і пасля першага прапушчанага гола, таму не магу прад'явіць прэтэнзіі за самааддачу.
Шэсць гульцоў з асноўнага саставу не выходзяць. Гуляем без асноўных крайніх паўабаронцаў, таму забіваць цяжка, таму і Шыкаўку складана. Прыйшоў час добра падумаць над падборам гульцоў у наступным годзе, каб такая сітуацыя не паўтарылася. Рады, што вярнуўся ў склад Ауіе, Кібук і Цімашэнка пачалі трэніравацца. Спадзяёмся, што хутка ўсё наладзіцца.
- Па InStat-індэксе лепшыя ў складзе «Слуцка» Барыс Панкратаў (258), Сяргей Ясінскі (214), Яўгеній Шыкаўка (214), Роберт Прымус (212), Мурат Хотаў (210). Барыса Панкратава назвалі лепшым гульцом каманды ў гэтым матчы.
24 лістапада на «Гарадскім» каманда нашага горада правядзе апошнюю дамашнюю гульню ў гэтым сезоне. Матч з «Іслаччу» пачнецца ў 14.00.
Падтрымаем сваіх. За Слуцк і «Слуцк», разам!
К списку записей раздела