На мінулым тыдні на базе Слуцкага раёна прайшоў абласны семінар па пытаннях нарыхтоўкі кармоў у сельскагаспадарчых арганізацыях з удзелам Міністра сельскай гаспадаркі і харчавання Рэспублікі Беларусь Леаніда Канстанцінавіча Зайца, старшыні Мінскага абласнога выканаўчага камітэта Анатолія Міхайлавіча Ісачанкі, кіраўнікоў райвыканкамаў вобласці, начальнікаў упраўленняў сельскай гаспадаркі і харчавання.

У Слуцкім раёне ў ліку першых прыступілі да зялёнага жніва. Удзельнікі семінара пазнаёміліся з арганізацыяй работы па корманарыхтоўцы ў адкрытым акцыянерным таварыстве «Аграфірма «Лучнікі». У сельгасарганізацыі палосным метадам пасеяны свірэпа і азімае жыта. Гэта тэхналогія апраўдвае сябе: пачатак мая, а ў гаспадарцы ўжо высакаякасны пажыўны корм для жывёлы. Гэты метад практыкуецца і ў іншых гаспадарках раёна.

Дырэктар цэнтра павышэння кваліфікацыі кіраўнікоў, работнікаў і спецыялістаў Магілёўскай вобласці Якаў Усцінавіч Яроцкі расказаў аб тэхналогіі вырошчвання палосных пасеваў, у тым ліку аб падборы плошчаў па севаабароце, норме высеву і ўнясенні мінеральных угнаенняў. Таксама была праведзена  дэманстрацыя работ па арганізацыі сустрэчнага падкошвання многакампанентных пашаў.

Нарыхтоўка кармоў павінна прайсці ў максімальна сціслыя тэрміны – за 10 – 12 дзён, звярнуў увагу старшыня Мінскага аблвыканкама Анатолій Міхайлавіч Ісачанка. У вобласці для гэтага ёсць усё неабходнае: працаўнікі, тэхніка, паліва. Неабходна ўбраць травы як мага хутчэй, пры гэтым нельга забываць пра якасць. Падчас корманарыхтоўкі важна ўкласціся ў тэхналагічныя тэрміны і не ўпусціць момант, калі ў зялёнай масе павышанае ўтрыманне бялку і вугляводаў.

Міністр сельскай гаспадаркі і харчавання Леанід Канстанцінавіч Заяц адзначыў, што да пачатку ўборкі збожжавых неабходна сабраць некалькі ўкосаў травы, у аснове якіх люцэрна. А калі добры травастой, як у Слуцкім раёне, можна і тры. Кармы, багатыя энергіяй і бялком, садзейнічаюць павышэнню прадукцыйнасці дойнага статка, прываг, захаванасці маладняку. Тут ужо можна гаварыць і пра выкананне пастаўленых Прэзідэнтам краіны задач па пераадоленні сямітысячнага рубяжу па ўдоі малака ад каровы да 2020 года.

– Нельга марудзіць з касьбой зараз, бо можна згубіць трэці ўкос. Важна арганізавацца і распачаць уборку травы ў тэрмін, – заўважыў Л.К. Заяц.

Таксама ён адзначыў, што з кожным годам у краіне атрымліваюць усё больш малака і мяса. Але каэфіцыент карыснага дзеяння кармоў павінен быць вышэй. Асноўныя прэтэнзіі тут да гаспадарак з нізкай эканамічнай эфектыўнасцю. Таму кіраўнікам, спецыялістам, сярэдняму звяну неабходна звярнуць увагу на выканальніцкую дысцыпліну, выкананне тэхналагічных рэгламентаў. Без гэтага дасягнуць высокіх паказчыкаў практычна немагчыма. І ў кожнай гаспадарцы павінны ўсвядоміць, што за іх саміх гэту работу ніхто не зробіць. Трэба проста мець жаданне працаваць, а не шукаць адгаворкі. Сёння няма інфармацыйнага вакууму, які б перашкаджаў самаразвіццю і самаадукацыі, ёсць інтэрнэт, дастаткова спецыялізаванай літаратуры, дзе можна знайсці шмат рознай інфармацыі. Нават перадавыя гаспадаркі адкрыты для кожнага – трэба толькі больш настойліва цікавіцца.

Падчас семінара абмеркавалі пытанні нарыхтоўкі кармоў у стрэтч-плёнку, абавязковага прымянення біялагічнага кансерванту для лепшай захаванасці кармоў. У ліку праблемных пытанняў – будаўніцтва сіласна-сянажных траншэй (у вобласці асвоена толькі 29 працэнтаў выдзеленых на гэта сродкаў), узвядзенне клюшачнікаў, вытворчасць малака. Гэтыя тэмы абмеркавалі падчас пленарнага пасяджэння.

Ірына КАВАЛЕНКА.