Бульбу, моркву, буракі і іншыя дары восені стараюцца як мага хутчэй убраць у сельгасарганізацыях Случчыны
20.10.2022
Так, другі хлеб ужо ўбралі на 305 гектарах (87% ад запланаванага). Накапалі 8 362 тоны пры сярэдняй ураджайнасці 274 цэнтнеры з гектара.
Найбольшыя плошчы, як і ў іншыя гады, пад гэту культуру адведзены ў саўгасе «Рачкавічы» Беларускай чыгункі – 260 гектараў. Убралі 83% бульбяных плошчаў. Накапалі 6 123 тоны другога хлеба, з якіх 5 120 тон засыпалі на захоўванне.
Вырошчаюць у нашым раёне і іншую агародніну. Ужо ўбралі цыбулю, у разгары – работы па ўборцы капусты, сталовых буракоў, морквы. Сабрана 132 тоны агародніны.
Яблыкі нарыхтоўваюць у 4 сельгасарганізацыях раёна – у сельскагаспадарчым філіяле Слуцкага сыраробнага камбіната, у ААТ «Падлессе-2003», філіяле «ПСГ«Наша Ніва» ААТ «Слуцкі мясакамбінат» і філіяле «ПСГ» ААТ «Слуцкі мясакамбінат».
Усяго яблыневыя сады займаюць 232 гектары, на 155 гектарах яблыкі ўжо сабралі, 841 тону.
Да ўборкі ўраджаю актыўна падключаецца моладзь. Так, школьнікі Падлескага і Ленінскага ВПК дапамагаюць на ўборцы яблык у ААТ «Падлессе-2003».
– Такія цудоўныя, вялікія, духмяныя яблыкі. Адно задавальненне іх збіраць, – гавораць дзесяцікласніцы Падлескага ВПК Аліна Барчук і Марыя Козел.
– Наша школа арандуе ў мясцовай сельгасарганізацыі адзін гектар садоў. Сад малады, усе дрэўцы нізкарослыя, толькі, зрывай яблыкі, працуй. Мы дапамагаем у зборы садавіны таксама сельгасарганізацыі: настаўнікі, дзеці, тэхнічныя работнікі школы – усяго нас 40 чалавек, – расказала дырэктар Падлескага ВПК Наталля Бочкіна.
Цукровыя буракі – яшчэ адзін клопат аграрыяў раёна. Салодкія караняплоды ўбраны на 2 703 гектарах, сабраны 97 459 тон пры сярэдняй ураджайнасці 361 цэнтнер з гектара. На буракапрыёмныя пункты вывезена 85 069 тон. Радуе і цукрыстасць – 16.6, добрая для гэтай пары.
І каб жывёлу накарміцьбыло чым, таксама клапоцяцца ўсё лета і восень аграрыі. Так, кукуруза ўжо ўбрана на 17 898 гектарах сельгасугоддзяў (72%). Нарыхтавана 334 043 тоны сіласу (78% да плану), 10 358 тон сена (56%), 301 454 тоны сенажу (91%), у тым ліку 3 369 тон (10%) у палімерную ўпакоўку.
Усяго ў раёне па стане на 20 кастрычніка нарыхтавана 182 933 тоны кармавых адзінак (83% ад неабходнага). На ўмоўную галаву жывёлы гэта складае 29 цэнтнераў кармавых адзінак.
Наталля ГРАМЫКА.
К списку записей раздела