Работніца ААТ «Слуцкі мясакамбінат» Валянціна Чумарова лічыць, што працаваць трэба з натхненнем і самааддачай
15.11.2020
Работніца ААТ «Слуцкі мясакамбінат» Валянціна Чумарова лічыць, што працаваць трэба з натхненнем і самааддачай.
Валянціна быццам свеціцца радасцю, яна ў вачах, усмешцы жанчыны, у тым, як яна расказвае пра сваё жыццё, работу. Рацэпт яе шчасця: Валянціна Георгіеўна ўмее радавацца дробязям, бачыць у будзённым адмысловасць, цаніць тое, што ёсць. І самае галоўнае – кожны яе дзень напоўнены любоўю: да сям’і, да Слуцка, які стаў родным, да сваёй справы.
Мы сядзім на лаўцы ў двары камбіната. Мая субяседніца дзеліцца ўспамінамі…
39-ты год Валянціна Георгіеўна Чумарова працуе ў ААТ «Слуцкі мясакамбінат», у тым ліку 27 гадоў – апаратчыкам тэрмічнай апрацоўкі каўбасных вырабаў. Расказвае, на камбінат прыйшла пасля заканчэння Мінскага прафтэхвучылішча №38 харчавікоў, дзяўчынка зусім. Спачатку працавала апрацоўшчыцай натуральнай каўбаснай абалонкі, а ў 1993 годзе рашыла паспрабаваць свае сілы на этапе тэрмічнай апрацоўкі каўбас. З таго часу і займаецца гэтай справай.
– Не прыхільніца змен? Столькі гадоў на адным працоўным месцы…
– Ды жадання не ўзнікала пайсці з роднага прадпрыемства, – адказвае Валянціна Георгіеўна. – Нават у самыя цяжкія перыяды дзейнасці камбіната. Цяпер прадпрыемства працуе стабільна, як мае быць. Іду на работу і сэрца радуецца.
Валянціна Георгіеўна расказвае пра працэс тэрмічнай апрацоўкі каўбасных вырабаў: у спецыяльных універсальных камерах, у залежнасці ад тэхналогіі гатавання, вараць і вэндзяць разнастайныя каўбасы, для вэнджання выкарыстоўваюць альховыя трэскі. Працуе аўтаматыка па зададзеных праграмах. Аператары, а іх на змене тры чалавекі, сочаць за працэсам апрацоўкі вырабаў: тэмпературай, вільготнасцю, часам і гэтак далей. Працуюць 9 камер, у кожнай – па чатыры рамкі для каўбасных вырабаў, якія загружаюць аператары. У сярэднім за дзень у камерах тэрмічнай апрацоўкі гатуюць каля 10 тон каўбасных вырабаў. Гэта, можна сказаць, апошні этап іх вытворчасці, яшчэ – ахалоджванне, а затым каўбасы адпраўляюць на продаж.
– Вы гаворыце, аднатыпная ў мяне работа… – працягвае дыялог Валянціна Георгіеўна. – Для мяне – ніколечкі. Мне цікава займацца гэтай справай, укараняюцца новыя тэхналогіі, вытворчасць Слуцкага мясакамбіната не стаіць на месцы. Канечне, дапамагае аўтаматыка, камп’ютарызацыя вытворчага працэсу. А вось у 90-я, калі я толькі прыйшла на гэту работу, тэрмічная апрацоўка каўбасных вырабаў была на ручным кіраванні: аператары самі рэгулявалі тэмпературу, час апрацоўкі і іншыя параметры. З удзячнасцю ўзгадваю працаўніцу камбіната Алу Пятроўну Літвіновіч, якая дапамагала мне ў авалоданні нюансамі гэтай работы.
Валянціна Георгіеўна дзеліцца, што на змене працуе з калегамі Наталляй Кахановіч і Зояй Бранавіцкай – руплівыя, адказныя работніцы і нераўнадушныя людзі. Заўсёды з разуменнем адносяцца да падначаленых начальнік мясаперапрацоўчага цэха Юлія Алегаўна Бярэзіна, майстры цэха.
– Мы ганарымся прадукцыяй нашага камбіната, – адзначае мая суразмоўца. – Яна якасная, пацверджана ўзнагародамі рознага, у тым ліку міжнароднага, узроўню, і яна смачная. Заўсёды раю яе сваім знаёмым, бо ведаю, як яе вырабляюць. На Слуцкім мясакамбінаце высокапрафесійны калектыў, клапоцяцца аб працаўніках. Вось і цяпер, у перыяд асаблівай эпідэмічнай сітуацыі, прыняты максімальныя меры па прафілактыцы распаўсюджання каронавіруснай інфекцыі: санпрапускнік, масачны рэжым, дэзінфекцыя памяшканняў і іншае.
Я даведалася, што за сваю адданую работу Валянціна Георгіеўна Чумарова не раз была адзначана граматамі, у тым ліку Мінаблмясамалпрама, яе фотаздымак быў змешчаны на Дошцы гонару прадпрыемства ў 2018 годзе.
…Непадалёку ад лаўкі прыпыніўся аўтамабіль, адкуль прыветліва махаў рукой мужчына.
– Гэта мой муж Уладзімір, – усміхалася Валянціна. – Чакае, калі скончыцца інтэрв’ю.
Як аказалася, яе сямейная гісторыя таксама звязана з гэтым прадпрыемствам. Разам з будучым мужам Валянціна вучылася ў адным прафтэхвучылішчы, пасля заканчэння размеркаваліся на Слуцкі мясакамбінат, ну і атрымалася яшчэ адна «ячэйка грамадства». Уладзімір Віктаравіч Чумароў працуе на камбінаце сартавальнікам скур, а дачка – Уладзіміра і Валянціны – Ірына – бухгалтар у разліковым аддзеле прадпрыемства.
– Родам я з Чэрвенскага раёна, а муж – з Урэчча. Столькі гадоў прайшло на слуцкай зямлі, усё тут ужо роднае, роднае і прадпрыемства… – адзначае Валянціна Георгіеўна. – Ёсць сілы, вопыт, працуем і жывём з натхненнем, з душой, самааддачай. Інакш нельга чалавеку.
Наталля СЕЛЯЗНЁВА.
К списку записей раздела