Да юбілейнага дня нараджэння ў гімназіі абнавілі інтэр’еры, падрыхтавалі шэраг цікавых мерапрыемстваў, а 3 лютага сабраліся ў гарадскім Доме культуры, каб павіншаваць калектыў, ветэранаў, гімназістаў і іх бацькоў, выпускнікоў установы са слаўнай датай. На свяце прысутнічалі намеснік старшыні Мінаблвыканкама Віктар Іванавіч Сірэнка, намеснік начальніка галоўнага ўпраўлення дашкольнай, агульнай сярэдняй і спецыяльнай адукацыі Міністэрства адукацыі Рэспублікі Беларусь Ірына Уладзіміраўна Каржова, начальнік упраўлення адукацыі Мінаблвыканкама Галіна Мікалаеўна Казак, старшыня Слуцкага райвыканкама Андрэй Уладзіслававіч Янчэўскі, дэпутат Палаты прадстаўнікоў Нацыянальнага сходу Рэспублікі Беларусь Валянціна Вітальеўна Ражанец, іншыя шматлікія госці. Навучэнцы гімназіі падчас экскурсіі па абноўленым будынку пазнаёмілі з асноўнымі вехамі гісторыі ўстановы адукацыі і расказалі пра яе выдатных выпускнікоў, партрэты якіх размешчаны на сценах.

Каля аднаго са стэндаў – былыя вучні ў той час сярэдняй школы №1, якія скончылі ўстанову ў 1967 годзе. У верасні яны адзначалі пяцідзесяцігоддзе з дня выпуску і на юбілей роднай школы сабраліся зноў з задавальненнем. Аляксандр Георгіевіч Доўбік з самага выпуску не жыве на радзіме, застаўся пасля заканчэння навучальнай установы ў Пецярбургу, але стараецца прыязджаць у Слуцк кожны год, каб пабачыць родных, наведаць могілкі. І хоць лёс раскідаў па свеце аднакласнікаў, некаторыя згубіліся, яны сустракаюцца кожныя пяць гадоў. Школьнае сяброўства – гэта на ўсё жыццё, практычна кожны год Аляксандр Георгіевіч з радасцю бачыцца з Уладзімірам Бязрукавым і Уладзімірам Гарбачом, Вялянцінай Кузняцовай, Антанінай Кругловай і некаторымі іншымі. Цягне на радзіму, гаворыць ён, гэта сваё, роднае.