У цэнтры ўвагі – людзі пажылога ўзросту
01.11.2019
Для прадухілення ўзнікнення пажараў працуюць назіральныя камісіі, інспектары Слуцкага раённага аддзела па надзвычайных сітуацыях і работнікі Слуцкага тэрытарыяльнага цэнтра сацыяльнага абслугоўвання насельніцтва актыўна праводзяць прафілактычныя рэйды ў прыватным жылым сектары. У адзін з іх адправілася карэспандэнт «Слуцкага краю».
– Асаблівую ўвагу мы надаём дамам, у якіх пражываюць пажылыя, адзінокія, інваліды, – адзначыў начальнік сектара дзяржаўнай сістэмы папярэджання і ліквідацыі надзвычайных сітуацый і грамадзянскай абароны Аляксандр Мікалаевіч Жарскі. – Часцей за ўсё рызыка ўзнікнення пажараў ёсць у іх, паколькі ў сілу сваіх узроставых асаблівасцей не заўсёды ўважлівыя да пытанняў бяспекі. На вялікі жаль, часта яны проста не разумеюць, якая небяспека пагражае не толькі ім, але і іх суседзям.
Першы адрас – утульны домік у вёсцы Селішча, на парозе якога падазроным поглядам нас сустрэў чорны кот.
Не менш падазрона паставілася да гасцей і гаспадыня.
– А вы з якой мэтай? Хто такія? – цікавілася яна. – Да мяне ўжо прыходзілі, пытанні задавалі. Я ўжо перапісалася!
– А мы з іншымі пытаннямі! – усміхаючыся, адказаў інспектар. – Калі здарыўся пажар, па якім нумары тэлефанаваць будзеце?
– Дык гэта... У мяне ў кніжачцы запісана дзесьці, – замітусілася жанчына.
– А ў экстранай сітуацыі ў вас не будзе часу на пошукі…
Гаспадыні ўручылі памятку па пажарнай бяспецы і параілі прымацаваць яе на бачным месцы.
Не памятала тэлефонаў экстраных службаў і гаспадыня наступнага дома. І толькі пасля падказкі дачкі назвала правільны нумар.
– Можа вам патрэбна дапамога сацыяльнага работніка? У вас жа ўзрост, да таго ж ёсць інваліднасць, – цікавіліся работнікі сацыяльнай службы.
– Дзякуй, мы самі спраўляемся, – адказала дачка гаспадыні дома. – Мама ніколі не бывае адна. Калі я паеду – сястра прыязджае. Ды і мама, дзякуй богу, яшчэ крэпенькая ў нас. Мы і пажарны апавяшчальнік устанавілі.
Пажылых грамадзян пераканаць у чымсьці часам вельмі складана.
Па адным з адрасоў дзверы нам адчынілі адразу, але з парога заявілі, што пажарная бяспека ў іх у парадку і ніякая дапамога не патрэбная. Аднак праверыць на ўсялякі выпадак усё ж прапусцілі. Праводка і разеткі – у здавальняючым стане, але, як і ў большасці наведаных падчас рэйду дамоў, адсутнічаў аўтаномны пажарны апавяшчальнік. На заўвагу інспектара пажылая пара адказала, што ён ім не патрэбны. Бо ў доме ніхто не курыць.
– Ды і чуў, многія кажуць, што ён толькі перашкаджае. Пішчыць ні з таго ні з сяго. Яно нам трэба? Столькі гадоў без яго жылі і далей пражывём.
– Зусім нядаўна падобны апавяшчальнік выратаваў жыццё пенсіянеру, – спрабаваў пераканаць, што гэта дзеля іх жа бяспекі, супрацоўнік РАНС. – І пішчаць ён проста так не будзе, трэба толькі своечасова замяніць батарэйку.
Канкрэтны прыклад прымусіў пенсіянераў задумацца, і яны паабяцалі папрасіць дзяцей набыць і ўстанавіць прыбор.
– Ну, раз сапраўды дапамог, то хай будзе, – казалі яны.
Падчас наведвання домаўладанняў удзельнікі рэйду напаміналі пажылым людзям, наколькі важна выконваць правілы бяспекі і што ў большасці выпадкаў пажары адбываюцца менавіта па віне чалавека. Асаблівая ўвага звярталася на стан электраправодкі, эксплуатацыю электраабсталявання, адсутнасць пажарных апавяшчальнікаў. Падрабязна гаварылі пра правільную эксплуатацыю пячнога ацяплення, паводзіны ў экстраннай сітуацыі і дзеянні пры выяўленні пажару, нагадалі тэлефоны экстраных службаў.
Такая прафілактычная мера, лічаць пажарныя, дапаможа паменшыць колькасць узгаранняў у раёне, прадухіліць бяду.
Ірына МАЛЯЎКА.
К списку записей раздела
© Слуцкий край, 2017 – 2023
Полная перепечатка материалов и фотографий без письменного согласия главного редактора «Слуцкого края» запрещена. Частичное цитирование разрешено при наличии прямой активной ссылки на источник.