Работа Ірыны, прадстаўленая на чэмпіянаце, называецца “Мой родны кут”. Гэта сапраўдны мастацкі твор, выкананы філігранна, з густам, эстэтыкай. Ніколі не здагадацца, што яркая прыгожая паляна з макамі, лубінам, незабудкамі, апетытнымі суніцамі і лісічкамі  выканана  з харчовых рэчываў, кандытарскіх інгрэдыентаў, сярод якіх пераважае цукровая мастыка. Здаецца, вось-вось затрапечуць тоненькія пялёсткі кветак, а да сунічкі так і цягнецца рука. Адрозніць ад свежай сапраўднай ягады фактычна немагчыма. Як аказалася, мох на паляне зроблены з малекулярнага бісквіту.

- Канечне, гэта карпатлівая працаёмкая работа, - усміхаецца Ірына. – Патрэбна было зрабіць вельмі дробныя дэталі кампазіцыі, напрыклад, драпінкі на ягады або тычынкі лубіну. Атрымалася. Кандытарскую кампазіцыю  прыдумала сама, тэма навеяна Годам малой радзімы. Дапамагала мне парадамі, ідэямі старшы майстар кандытарскага цэха нашага прадпрыемства Іна Міхайлаўна Махлай. Мне падабаецца мая работа, пэўна, таму і атрымліваецца.

Ірына Анатольеўна Баскакава працуе на Слуцкім хлебазаводзе з 2012 года. Адказная і таленавітая, гавораць пра яе на прадпрыемстве. Кампазіцыі Ірыны  з цеста, іншых кандытарскіх матэрыялаў неаднаразова былі прадстаўлены на конкурсах і  выставах рознага ўзроўню. Спыняцца на дасягнутым Ірына не збіраецца, гаворыць, кандыдарскі чэмпіянат “Продэкспо-2018” натхніў на новыя работы.

Наталля Селязнёва.