Урачыстае адкрыццё XV Майскіх Віткаўскіх чытанняў прайшло ў Слуцкай раённай цэнтральнай бібліятэцы
17.05.2022
Сёлета яны атрымалі назву «Сонечны казачнік Случчыны».
А распачалося свята радкамі верша Мікалая Маляўкі «Ён упрыгожыў свет», прысвечанага нашаму знакамітаму земляку – Цімоху Крысько – Васілю Вітку, пісьменніку шматграннага таленту, класіку беларускай дзіцячай літаратуры, першаму рэдактару часопіса «Вясёлка», ураджэнцу вёскі Еўлічы.
Прывітальны адрас ад старшыні Слуцкага раённага выканаўчага камітэта Уладзіміра Гогі з гэтай нагоды зачытала намеснік начальніка аддзела ідэалагічнай работы, культуры і па справах моладзі райвыканкама Іна Гапановіч.
Як адзначыла дырэктар бібліятэкі Людміла Гурыновіч, у гэтым годзе спаўняецца 65 гадоў з дня заснавання дзіцячага часопіса «Вясёлка». Яна запрасіла рабят прыняць актыўны ўдзел у мерапрыемствах, якія па традыцыі на працягу тыдня пройдуць у бібліятэцы і дапамогуць глыбей пазнаёміцца з творчасцю славутага земляка, а таксама наведаць «літаратурны бульвар», прысвечаны творам Васіля Віткі.
Рабяты са школ горада і раёна з задавальненнем адгадвалі загадкі, чыталі скарагаворкі пісьменніка і яго творы, наведалі і «Птушыную школу», дзе даведаліся шмат цікавага пра птушак, іх павадкі з твораў земляка.
А вучні Акцябрскай базавай школы імя Васіля Віткі і Замосцкай сярэдняй школы прынялі ўдзел у тэлемасце, які арганізавалі і правялі супрацоўнікі Слуцкай бібліятэкі і бібліятэкі-філіяла №6 імя Васіля Віткі ДУ «Цэнтралізаваная сістэма дзіцячых бібліятэк г. Мінска». Рабяты змаглі не толькі пазнаёміцца з цяперашнім рэдактарам часопіса «Вясёлка» Уладзімірам Ліпскім, але і зачытаць свае любімыя вершы, пацешкі, іншыя творы. Прыемна, што такой магчымасцю скарысталіся не толькі слуцкія школьнікі, але і сталічныя.
Душэўнай атрымалася сустрэча вучняў слуцкіх школ з лаурэатам прэміі часопіса «Вясёлка» імя Васіля Віткі Маргарытай Прохар – пісьменнікам, журналістам, рэдактарам канала «Культура» Першага нацыянальнага Беларускага радыё.
Падчас сустрэчы Маргарыта Пятроўна расказала пра сваю кніжку для дзяцей «Камп’ютарныя коткі» і як нарадзілася ідэя яе стварэння. Дарэчы, першыя казкі з яе былі таксама спачатку надрукаваны ў часопісе «Вясёлка».
І гэта далёка не ўсе мерапрыемствы, на якія запрашаюць моладзь супрацоўнікі Слуцкай раённай цэнтральнай бібліятэкі. На працягу Тыдня Віткаўскіх чытанняў рабят чакаюць розныя тэатральна-гульнёвыя праграмы, сустрэчы з пісьменнікамі, літаратурныя квэсты, інтэрактыўныя гульнёвыя падарожжы.
Наталля ГРАМЫКА.
К списку записей раздела