«Алена Васілевіч і яе прастора дабрыні»
09.12.2022
Кранальнае мерапрыемства, прысвечанае 100-годдзю з дня нараджэння нашай знакамітай зямлячкі пісьменніцы Алены Васілевіч, прайшло ў Слуцкай раённай цэнтральнай бібліятэцы.
У ім прынялі ўдзел чытачы, работнікі культуры, школьнікі. Вялі сустрэчу акцёр і рэжысёр Слуцкага гарадскога дома культуры Яўген Віктаравіч Сакольскі і загадчыца аддзела абслугоўвання і інфармацыі чытачоў бібліятэкі Валянціна Раманаўна Цэгалка.
Алена Сямёнаўна Васілевіч нарадзілася ў вёсцы Ліпнікі на Случчыне. У яе жыцці было нямала выпрабаванняў – сіроцтва, вайна, голад… Аднак ва ўсіх жыццёвых сітуацыях яна заставалася добрым, чулым, уважлівым чалавекам, а яшчэ – вялікім талентам. Аповесці, апавяданні, іншыя творы Алены Васілевіч прысвечаны тэмам духоўнага сталення, маральнага выбару, раскрыццю характараў людзей. Алена Васілевіч – лаўрэат Дзяржаўнай прэміі БССР (1976) за тэтралогію «Пачакай, затрымайся…».
Цёплымі ўспамінамі пра Алену Сямёнаўну падзяліліся яе сын Уладзімір Аляксандравіч Васілевіч, фалькларыст і этнограф; былы дырэктар Мялешкаўскай СШ, выдатнік народнай адукацыі БССР Людміла Мікалаеўна Бараноўская; дырэктар Слуцкай раённай цэнтральнай бібліятэкі Людміла Васільеўна Гурыновіч; мастак Ігар Адамавіч Ціткоўскі.
Падчас мерапрыемства па відэасувязі вялі размову з супрацоўніцай Дзяржаўнага музея гісторыі беларускай літаратуры Палінай Мікалаеўнай Савген, якая расказала пра літаратурна-дакументальную экспазіцыю музея «Насустрач жыццю, насустрач будучыні», прысвечаную творчасці Алены Васілевіч.
Дарэчы, у Слуцкай бібліятэцы таксама разгорнуты выставы і экспазіцыі, прысвечаныя нашай знакамітай пісьменніцы, журналісту і перакладчыцы, у тым ліку прадстаўлены кнігі з асабістай бібліятэкі Алены Васілевіч, якія падораны ўстанове.
На сустрэчы гучала музыка ў выкананні выкладчыка Слуцкай дзіцячай школы мастацтваў Аляксандра Ляха і навучэнца Аляксандра Яноўскага. А яшчэ – урыўкі з твораў Алены Васілевіч, прасякнутыя вялікай сілай беларускага слова, мудрасці і пачуццяў.
Наталля Селязнёва.
К списку записей раздела