Як запісацца на вакцынацыю? Адказвае галоўны санітарны ўрач Слуцкага раёна
25.03.2021
Гэтая тэма нямала цікавіць случчан. У рэдакцыю газеты «Слуцкі край» паступіла некалькі званкоў ад гараджан, якія цікавіліся, дзе і як у Слуцку можна запісацца на бясплатную вакцынацыю, і што для гэтага неабходна.
На пытанні чытачоў адказаў галоўны дзяржаўны санітарны ўрач Слуцкага раёна Павел Валер'евіч КУЧКО.
- Калі пачнецца масавая вакцынацыя на Случчыне?
– Мы чакаем пастаўку вакцыны ў красавіку. Дакладная дата пакуль што невядома.
- Вакцына вытворчасці якой краіны будзе выкарыстоўвацца?
– Пацыентам прапануюць двухфазную вакцыну «Спутник V» беларускай вытворчасці і «Верацэл» (Кітай). Дарэчы, кітайская вакцына ўжо паступіла і знаходзіцца на рэспубліканскіх складах. Вядома, больш масава будзем прывіваць случчан вакцынай айчыннай вытворчасці.
- Ці можна на дадзены момант запісацца на вакцынацыю і дзе гэта зрабіць?
– Папярэдне можна запісацца ў Слуцкай цэнтральнай раённай бальніцы, звярнуўшыся да ўчастковага ўрача. Там жа можна ўдакладніць усю інфармацыю па гэтым пытанні. Таксама цэнтралізавана збіраюцца спісы жадаючых на прадпрыемствах і ў арганізацыях горада і раёна. Для гэтага чалавеку трэба звярнуцца ў адміністрацыю прадпрыемства, дзе ён працуе.
- Як будзе адбывацца працэдура, і якія дакументы трэба падаць?
– Гэта будзе добраахвотная вакцынацыя грамадзян Беларусі ва ўзросце ад 18 гадоў. Прыйсці ў пункт вакцынацыі трэба з пашпартам ці іншым дакументам, які сведчыць асобу. Спачатку будзе праводзіцца медагляд пацыента, на падставе якога спецыяліст вызначае адсутнасць і (або) наяўнасць супрацьпаказанняў да вакцынацыі. Затым чалавеку неабходна запоўніць пісьмовую згоду на правядзенне вакцынацыі супраць COVID-19. Пасля прышчэпкі 30 хвілін пацыенту давядзецца правесці ў пункце вакцынацыі пад наглядам спецыялістаў.
Дарэчы, прышчэпка ўводзіцца двойчы. На другі этап запісваюць аўтаматычна пасля ўводу першага кампанента.
- Трэба здаваць якія-небудзь аналізы загадзя, напрыклад, на наяўнасць антыцел?
– Не, усё робіцца на месцы перад непасрэднай вакцынацыяй.
- Ці патрэбна вакцынацыя, калі чалавек ужо перахварэў?
– У любым выпадку неабходна зрабіць тэст на антыцелы. Нельга рабіць прышчэпку ў той момант, калі ў пацыента назіраюцца сімптомы COVID-19. Вакцынацыя не рэкамендуецца і калі чалавек перанёс грып або іншую вострую рэспіраторную інфекцыю на працягу апошніх двух тыдняў. Дарэчы, прышчэпкі пакуль не робяць цяжарным і дзецям да 18 гадоў, маці, якія кормяць дзяцей.
Памятайце, вакцына супраць COVID-19 не адмяняе для прышчэпленага пацыента неабходнасць насіць маскі і пальчаткі, а таксама выконваць сацыяльную дыстанцыю!
Ірына МАЛЯЎКА.
© Слуцкий край, 2017 – 2023
Полная перепечатка материалов и фотографий без письменного согласия главного редактора «Слуцкого края» запрещена. Частичное цитирование разрешено при наличии прямой активной ссылки на источник.