Дзве Святланы, дзве суседкі-працаўніцы

Палова шостай гадзіны раніцы... Аператары машыннага даення МТК аг. Вясея ААТ «Вясейскі Пакроў» Святлана Чаркасава і Святлана Масюк – ужо на працы, рыхтуюцца да ранішняга даення кароў. Па тым, з якім настроем і як шпарка завіхаюцца, адчуваецца, што работу сваю жанчыны сапраўды любяць. Яшчэ і музыку з песнямі пра каханне слухаць паспяваюць. Кажуць, песня добрая і жыць, і працаваць дапамагае... А каб дасягаць добрых вынікаў у працы, трэба проста да гэтага імкнуцца.  

Рухавыя, жыццярадасныя, кажуць, да працы ў сферы сельскай гаспадаркі  прызвычаіліся яшчэ з юнацкіх гадоў. Дзве Святланы, дзве суседкі-сяброўкі і слаўныя працаўніцы ўжо з маладых гадоў дапамагалі сваім матулям на фермах, адна на Старадарожчыне, другая тут – у Вясеі.

– Ганаруся, што вось ужо два гады як працую на новым комплексе сельгасарганізацыі. Больш за 90% малака здаём экстра-класам, а ў мінулым месяцы – і ўсе 100! І гэта вынік працы і тых, хто рыхтуе кармы, і тых, хто працуе на комплексе разам з намі, – уключаецца ў размову  Святлана Чаркасава. – Ды хіба можна іначай!  Матуля працавала даяркай 36 гадоў, ужо 17 гадоў аператарам машыннага даення працую і я.  Мне ёсць з чым параўнаць, як было раней і зараз. Паглядзіце, якія добрыя ўмовы для жывёлы – чысціня, бяспрывязнае ўтрыманне... А для нас, работнікаў, – і пакой для адпачынку, і душавыя... Толькі працуй – і зарплату высокую атрымаеш.

Разам з мужам, які працуе вадзіцелем у сельгасарганізацыі, Святлана Валер’еўна выхавала дваіх дзяцей, сям’я трымае гаспадарку. У вольны час – любяць завітаць да ўнукаў у горад.

– З дзяцінства мяне вучылі, што кароўка –  карміцелька наша. Так яно і ёсць, – пераканана  Святлана Масюк, якая не толькі слаўная працаўніца на комплексе, але і матуля чацвярых дзяцей, трое з якіх ужо дарослыя. Глядзіш і думаеш, як толькі паспявае гэта жанчына: і на працы, і дома, ды яшчэ і кулінарка, кажуць, выдатная.

 – Адказныя, працавітыя, – гаворыць пра работніц загадчыца МТК Тамара Троцкая, якая працуе ў сферы сельскай гаспадаркі каля 40 гадоў. – Добра працуе ў мяне і другое звяно –  Тамара Каржэвіч і Святлана Беразоўская.  На такіх людзях, як мае дзяўчаты, і трымаецца вёска.

Наталля ГРАМЫКА.