Аснова ўраджаю яравых закладваецца вясной. У гэтым перакананы ў ААТ «Вясейскі Пакроў»
28.03.2024
Вясна ў гэтым годзе для аграрыяў раёна прыйшла раней. А таму ў сельгасарганізацыях стараюцца сеяць, пакуль дастаткова вільгаці ў глебе.
– Час прыйшоў – вось і сеем! – кажа механізатар ААТ «Вясейскі Пакроў» Анатолій Салдаценка. – Многа залежыць ад надвор’я. За дзень можна ад 30 да 50 гектараў пасеяць. А бывае ў поле выязджаем пазней, тады і вынік працы ніжэй. Сюды нам прывозяць гарачае харчаванне, што вельмі добра. А яшчэ за перавыкананую норму – і грашовае заахвочванне прадугледжана – таксама добры стымул. Канечне, на тэмпы і якасць уплывае і тое, наколькі добра падрыхтавана глеба. З гэтым відам работ у нас адмыслова спраўляецца механізатар Мікалай Курак. Бачыце, якое роўнае, прыгожае поле…
У сферы сельскай гаспадаркі Анатолій Салдаценка – больш за 30 гадоў. Спачатку працаваў у Мялешках, пасля аб’яднання сельгасарганізацый – у «Вясейскім Пакрове». За гэты час паспеў на рознай тэхніцы «паруліць». Восем гадоў таму Анатолію Мікалаевічу даверылі кіраваць энерганасычаным трактарам. Гаворыць, цудоўная машына. Сваю любоў да працы на зямлі ён перадаў і сыну Віталію, які таксама працуе на трактары ў сельгасарганізацыі.
За тым, як вядуцца палявыя работы, сочыць галоўны аграном гаспадаркі Артур Шклярэўскі.
– Вядзем перадпасяўную падрыхтоўку палей глебаапрацоўчым агрэгатам АКШ, выраўніваем глебу, – расказвае Артур Юр’евіч. – Гэта дазваляе дасягнуць яе дробнакамкаватай структуры, што ў сваю чаргу дае магчымасць пасеяць насенне на неабходную глыбіню, з улікам вільготнасці глебы.
Плошчу яравой сяўбы скарацілі, бо ў папярэднія гады ўраджайнасць яравых збожжавых значна саступала азімым. Павялічылі плошчы азімага ячменю і пшаніцы, ураджайнасць якіх працэнтаў на 30 – 40 большая. Зараз сеем толькі піваварны ячмень, каб выканаць дзяржзаказ. Адвялі 150 гектараў пад перспектыўны новы сорт айчыннай селекцыі, элітнае насенне якога набылі ў ААТ «Вітка-Агра». Унеслі пад культуру ўсе неабходныя мінеральныя ўгнаенні пры ворыве і культывацыі глебы. Ды і папярэднік – цукровыя буракі – добры.
Сяўбу яравога ячменю ў сельгасарганізацыі плануюць завяршыць да 1 красавіка. Ужо пасеялі авёс і аднагадовыя на зялёны корм. Рыхтуюць глебу пад цукровыя буракі. Аднак асноўныя палявыя работы яшчэ наперадзе. Плануецца, што ў гэтым сезоне тут асабліва разгарнуцца работы па сяўбе шматгадовых злакавых траў, люцэрны і кукурузы, што забяспечыць дастатковую колькасць кармоў для жывёлы.
Наталля ГРАМЫКА.
© Слуцкий край, 2017 – 2024
Полная перепечатка материалов и фотографий без письменного согласия главного редактора «Слуцкого края» запрещена. Частичное цитирование разрешено при наличии прямой активной ссылки на источник.