Лета – пара фестывальная. Творчым калектывам у гэты час не да адпачынку. Пакуль у Віцебску гучалі мелодыі «Славянскага базару-2010», у сонечным горадзе Нясебыр у Балгарыі народны ансамбль народнай песні і музыкі «Случчанскія святкі» (кіраўнік Сяргей Сцяпанавіч Пратасевіч) пакараў Еўрапейскі фальклорны чэмпіянат «Еўрафорум-2010».

– Народны калектыў народнай песні і музыкі «Случчанскія святкі» сёлета ўпершыню прымаў удзел у Еўрапейскім фальклорным чэмпіянаце «Еўрафорум-2010», – расказаў кіраўнік калектыву С.С. Пратасевіч. – Форум праходзіў на працягу дзесяці дзён. У ім прымалі ўдзел фальклорныя калектывы з Расійскай Федэрацыі, Польшчы, Літвы, Ізраіля, самым шматлікім было прадстаўніцтва Балгарыі, а Рэспубліку Беларусь на форуме прадстаўляў наш калектыў. Мы ўдзячны кіраўніцтву цукроварафінаднага камбіната за ўнікальную магчымасць прыняць удзел у чэмпіянаце такога ўзроўню.

З першага выступлення ансамбль «Случчанскія святкі» знайшоў свайго слухача і па выніках «Еўрафоруму-2010» стаў уладальнікам Гран-пры чэмпіянату «Залаты Арфей», залатога медаля Еўрафоруму, дыплома ў намінацыі «Адкрыццё чэмпіянату». «Случчанскія святкі» таксама прызнаны абсалютным еўрапейскім чэмпіёнам і лаўрэатам Еўрапейскага фальклорнага чэмпіянату «Еўрафорум-2010». З добрым ураджаем узнагарод вярнуліся нашы землякі на родную Случчыну.

«Случчанскія святкі», дарэчы, выступалі ў Балгарыі ў новым саставе: разам з узорным ансамблем танца «Канфеці». А яшчэ «Случчанскія святкі» запрашаюць маладых людзей на праслухоўванне.
– Шукаем маладыя таленты, – патлумачыў С.С. Пратасевіч. – Усіх, чыя душа спявае, будзем рады бачыць на праслухоўванні ў наш калектыў. Даведкі – па тэлефонах: 714-48-46 (velcom), 272-71-32 (MTС). Разам будзем праслаўляць родную Случчыну!

НА ЗДЫМКУ: С.С. Пратасевіч з Гран-пры чэмпіянату «Залаты Арфей» дзеліцца ўражаннямі з прадстаўнікамі тэлебачання.

Наталля ЖУК.