Састаў каманды: Міхайлаў, Козел, Дземенкавец, Пракапеня, Карпіленка, Рагожкін (к), (Гурыновіч, 18), Ждановіч, Кутышэнка (Шахраеў, 46), Касцюкевіч, С. Ліс, Пратасюк.

Супраць футбольнай каманды «Слуцкцукар» 24 ліпеня на стадыёне ДЮСШ-1 у горадзе Бяроза гулялі не толькі адзінаццаць футбалістаў ФК «Бяроза-2010», а яшчэ і перакладзіна, штанга і, здавалася, самі нябёсы. Таму матч 16-га тура сёлетняга чэмпіянату краіны па футболу ў другой лізе скончыўся нечакана... паражэннем «цукровых».

Гаспадары поля забілі хуткі гол – на 8-й хвіліне вызначыўся Варанко. Магчыма, менавіта ён збянтэжыў случчан і не даў магчымасці адыграцца ў першай палове сустрэчы. Хаця, напэўна, «цукровыя» ўжо павінны былі прывыкнуць да таго, што ўсе без выключэння каманды другой лігі выходзяць на матчы з ФК «Слуцкцукар» як на бой, бо ведаюць, што канкурэнт моцны. Але забіць не атрымалася ні ў Андрэя Кутышэнкі, ні ў Дзяніса Касцюкевіча, якія выйшлі на поле нападаючымі.

Другі тайм, на які асабіста я, ды і фанаты «цукровых» ускладалі шмат надзей, на гэты раз расчараваў. Случчанам не хапіла ўдачы – іншых агрументаў і прыводзіць не трэба. Пагадзіцеся, калі пасля ўдару Аляксандра Гурыновіча мяч трапляе ў перакладзіну, якраз па цэнтру, і вылятае з варот, не дакрануўшыся да сеткі, то ці не фатальнае гэта нешанцаванне? Яшчэ адзін эпізод, які стаў пацвярджэннем таго, што дзень быў не «цукровых»: «відушчы» прастрэл варот Аляксандра Пратасюка з левага фланга – мяч трапляе ў штангу і, памяняўшы траекторыю, вылятае з рамкі ФК «Бяроза-2010». А пра няздзейснены дубль Аляксандра Карпіленкі што казаць: метраў з пяці футбаліст спрабаваў прабіць галавой – мяч у сетку трапіў, але ж не з таго боку, другі раз Аляксандр прабіваў з правага фланга – не хапіла дакладнасці.

А гаспадары тым часам, хоць зорак з неба не хапалі, задачу сваю выканалі: стварылі тры моманты каля варот «цукровых» – усе тры і рэалізавалі. Хоць «стандарт», пасля якога гаспадары поля забілі другі гол, і застаецца на сумленні бакавога суддзі. Не будзь яго, магчыма, і трэцяга б не было... Але ж умоўны лад і футбол не сумяшчальныя. Па ўсяму было відаць, што выйшлі бярозаўцы «зараджаныя» на перамогу. Ды і, шчыра кажучы, «Бяроза-2010» – зусім не тая каманда, якая прыязджала ў Слуцк у мінулым сезоне: састаў амаладзіўся, ды і трэніруе іх сам Гурыновіч – былы футбаліст «Дынама» (Мінск).

Надзея на тое, што «цукровыя» здолеюць забіць гол прэстыжу, растала як кавалак цукру ў кубку з гарбатай пасля трэцяга гола ў вароты Сяргея Міхайлава. Пасля фінальнага свістка галоўнага суддзі сустрэчы было горка, што і казаць, але ж ва ўсім трэба шукаць нешта станоўчае: няхай выйграць не атрымалася, затое першы матч каманда правяла без «гарчычнікаў». Балельшчыкі ж «Слуцкцукру», якія прыехалі ў Бярозу, каб падтрымаць любімую каманду, патрабуюць рэваншу: адбудзецца ён напрыканцы сезона-2010 на гарадскім стадыёне ў Слуцку, калі ФК «Бяроза-2010» прыедзе на матч у 33-м туры чэмпіянату першынства краіны па футболу ў другой лізе. Лік павінен быць не меншым, толькі на карысць «цукровых».

А пакуль футбольныя баталіі трэцяга дывізіёна на гарадскім стадыёне сціхнуць на тыдзень. Каманды ідуць на перапынак. Першым праціўнікам «Слуцкцукру» ў другім крузе стане ФК «Жлобін». Матч паміж футбольнымі дружынамі адбудзецца 7 жніўня. Пачатак – у 17.00. Спадзяёмся, балельшчыкаў чакае відовішчная гульня. Верым у любімую каманду!

Наталля ЖУК.